Qasıqda qaşınan səpgi: tinea cruris və hormonlu krem səhvi

Qasıq dermatofitiyası, yəni tinea cruris, isti, nəm və tərləyən nahiyələrdə yaranan göbələk infeksiyasıdır. Şərhlərdə "Kömək edin, məndə də var, nə edim?" sualını o qədər çox gördüm ki, cavabı ayrıca yazmağa qərar verdim.

Necə görünür

• Qasıq qırışında və budun iç səthində qaşınan qırmızı səpgi
• Kənarları daha qabarıq və qabıqlanan, ortası nisbətən solğun halqa
• Yanma və tərlədikdə güclənən qaşınma
• Müalicə olunmadıqda ətrafa, bəzən sağrı nahiyəsinə yayılma

Kimlərdə daha çox olur

Çox tərləyənlərdə, idmançılarda, sıx və sintetik geyim geyinənlərdə, artıq çəkisi və ya şəkərli diabeti olanlarda. Çox vaxt mənbə insanın öz ayaq göbələyidir: göbələk ayaqdan dəsmal və ya alt paltarı vasitəsilə qasığa keçir. Ona görə müayinədə ayaqlara da baxıram.

Ən təhlükəli səhv: hormonlu krem

Aptekdən "qaşınmaya qarşı" alınan hormonlu və ya hormon qarışıqlı kremlər qaşınmanı tez azaldır, ona görə cəlbedicidir. Amma onlar göbələyi məhv etmir, əksinə, infeksiyanın daha geniş yayılmasına, xroniki və müalicəyə çətin tabe olan formaya keçməsinə səbəb ola bilər. Belə hallar son illərdə dermatoloqların ən çox narahat olduğu problemlərdən biridir.

Müalicə necə aparılır

• Əvvəlcə diaqnoz: qasıqda qızartı ekzema, psoriaz və ya maya göbələyi də ola bilər
• Göbələk əleyhinə krem adətən 2-4 həftə, səpgi keçdikdən sonra da bir müddət davam etdirilir
• Geniş yayılmış və ya təkrarlanan hallarda daxilə qəbul olunan müalicə
• Eyni vaxtda ayaq göbələyinin də müalicəsi

Təkrarlanmasın deyə

• Duşdan sonra qasığı yaxşıca qurulayın, ayaqları ayrıca dəsmalla
• Pambıq, boş alt paltarı geyinin, idmandan sonra dərhal dəyişin
• Dəsmalı və paltarı başqaları ilə paylaşmayın
• Səhər əvvəl corabı, sonra alt paltarını geyinin